ILOILO CITY- Hugot nga ginkondena sang Bayan kag Karapatan Panay ang ginapatihan nila nga indi makatawo nga pagpatay sa lima ka mga ginatudlo nga katapo sang rebelde nga grupo sa natabo nga encounter sa Aglonok, Calinog, Iloilo.
Sa interview sang Bombo Radyo kay Mr. Elmer Forro, Secretary General sang Bayan- Panay, iya ginpahayag nga dako ang ila pagduda nga may natabo nga pagpang-abuso sang pwersa sang military sa mga napatay nga mga rebelde.
Suno kay Forro, base sa sitwasyon sang lawas sang mga biktima, tuman ka damo kag dalagko sang kapilasan sang mga rebelde,partikular ang igo sang luthang sa ila nawong, ginasuspetsahan nga mga pilas tuga sang pagkabuno, mga bali nga mga butkon nga patimaan sang torture kag ini ang maathag nga violation sang laws of war.
Pahayag niya, ini ang rason kun nga ginapanawagan nila sa Commission on Human Rights (CHR) kag sa tanan nga human rights defenders kag advocates nga magpatigayon sang imbestigasyon.
Base sa statement nga ginpagwa sang Bayan- Panay, sa tion nga makumpirma sa imbestigasyon ang ginasuspetsahan nga violations, ini nga insidente ang mangin pinakaulihi sa serye sang state-perpetrated nga paglapas sa tawhanon nga kinamatarong nga nagluntad sa Panay nga nagsugod sa Antique 7 massacre sang 2018, Tumandok 9 massacre sang 2020 kag iban pa nga pagpamatay sa mga lider sang mga mamumugon kag pagpamomba sa mga civilian communities.
Sa amo man nga statement, ginaduso nila ang pagpadayon sang peace talks agud ma-address ang sentiment sang mga tawo kalakip na ang pagrespeto sa human rights.
