ILOILO CITY- Gin-aresto sang mga otoridad si Bagong Alyansang Makabayan (BAYAN) Panay Secretary-General Elmer Forro.
Si Forro ang nagapangatubang sang kaso nga murder kag multiple attempted murder.
Sa interview sang Bombo Radyo kay BAYAN Deputy Sec. Gen. Bryan Bosque, iya ginpahayag nga gindakop si Forro sa iya ginatiniran nga balay sa Cabatuan, Iloilo.
Suno kay Bosque, ang pag-aresto kay Forro ang kaangot sa natabo nga ambush sa Barangay Panuran, Lambunao, Iloilo sang Abril 7, 2020 sa diin isa ka soldado ang napatay.
Suno sa mga witnesses, sanday Forro kaupod si Karl Teodosio alias Obet/Andoy, leader sang SYP Baloy Platoon sang NPA Komiteng Rehiyon-Panay Central Front, ang nagpanguna sa pag-atake sa tropa sang gobyerno.
Magluwas sa duha ka personalidad, ginpasakaan man sang kaangay nga mga kaso ang duha ka mga respondents nga gin-identify bilang “John Does” sang Baloy Platoon.
Matandaan nga ang napatay sa engkwentro ang myembro sang 301st Infantry Brigade sang Philippine Army nga si Private First Class Mark Nemis sang Madalag, Aklan.
Ang engkwentro ang natabo samtang nagapatigayon sang ceasefire ang gobyerno kag Communist Party of the Philippines (CPP) sa tunga sang COVID-19 pandemic.
Nagapatigayon sadto sang security patrol kag information dissemination ang tropa sang gobyerno sang naengkwentro nila ang myembro sang Baloy Platoon sa Panuran, nga isa ka barangay nga may kalayuon nga 15 kilometers sa town proper sang Lambunao.
