Nagnubo ang baylo sang piso kontra sa US dollar kasunod sang deklarasyon sang national energy emergency kag pagpatuman sang whole-of-government response agud masiguro ang estable nga suplay sang enerhiya sa tunga sang kinagamo nga nagakatabo sa Middle East.
Suno sa isa ka economist ang pagluya sang piso bangud sang deklarasyon sang energy emergency samtang padayon ang pagsaka sang presyo sang gatong, nga mahimo magdala sang inflation sa double-digit nga lebel.
Sa idalom sang Executive Order 110, ginmanduan man ni President Ferdinand “Bongbong” Marcos Jr. ang pagpatuman sang Unified Package for Livelihoods, Industry, Food, and Transport (UPLIFT) para sa mga apektado nga sektor.
Katuyuan sini mapahulag ang gobyerno agud masiguro ang mapag-on nga suplay sang enerhiya, suportahan ang mga importante nga sektor kaangay sang transportasyon, agrikultura, kag micro, small, and medium enterprises (MSMEs), kag agud maprotektahan ang mga Pilipino batok sa kinagamo nga nagakatabo sa global market.
Nagpaandam naman si Department of Economy, Planning, and Development (DepDev) Secretary Arsenio Balisacan nga mahimo magsaka sa double-digit ang inflation kun magpadayon ang pagtaas sang presyo sang diesel, nga mahimo magsaka tubtob P162.50 kada litro sa Mayo kun mag-abot sa 200 dollars ang kada bariles sang krudo.
Sang Pebrero, ang inflation naglab-ot sa 2.4% nga isa sa pinakamadasig nga natabo sa 13 ka bulan halin sa 2.9% sang Enero 2025, ini bangod man sang pagsaka sang presyo sang pagkaon, mga ilimnon kag mga galastuhon sa balay.
