ILOILO CITY – Ginpatpat sang Kamara ang rason sang pagpa-iway sang barangay kag Sangguniang Kabataan (SK) election nga natalana kuntani sa Oktubre sini nga tuig.
Sa interview sang Bombo Radyo, ginpahayag ni Iloilo City Rep. Jerry Trenas nga sa ginpatigayon nga all-party caucus, ginkonsiderar ang kampanya batok sa iligal nga droga kag ang Martial Law sa Mindanao rason nga ginpakamaayo nga ipa-iway ang eleksyon.
Apang ang nagapanguna nga rason suno sa mamalidha amu ang Bangsamoro Basic Law (BBL).
Suno kay Trenas, mas ginadalian nga mapasar ang BBL bangud kun mapasar ang hagna, idungan ang referendum sa barangay election.
Nakasugtan sang mayorya nga patigayunon sa Mayo 2018 ang barangay election bangud ginatan-aw sang Kongreso nga sa ti-on nga ini, napasar na ang BBL.
Ginpasiguro sang mamalidha nga pamatian ang bahin sang Commission on Elections (Comelec) sa isyu.
Ginpahayag ni Trenas nga magapatigayon sila sang public hearings kag isa sa mga resource person ang Comelec.
Una na nagpahayag sang pagkabalaka ang Comelec sa desisyon sang Kongreso nga ipa-iway ang eleksyon sa barangay.
Sa interview sang Bombo Radyo, ginpahayag ni Comelec spokesman James Jimenez nga makaapekto ini sa preparasyon sang poll body sa 2019 automated election.