BACOLOD CITY – Ginpanugyan na sang Bacolod City Police Office sa tanan nga tagdumalahan sang commercial establishment nga mag-aligmat kasunod sang pag-atake sang martilyo gang sa duha ka jewelry store sa Bacolod City sa diin P4.5 million nga balor sang alahas ang nakawat.
Sa interview sang Bombo Radyo kay Police Col. Henry Biñas, Director sang Bacolod City Police Office, iya ginpahayag nga kumpirmado nga martilyo gang ang nagpangawat sa duha ka jewelry store sa sulod sang Gaisano Grand Mall.
Suno kay Biñas, kumpirmado nga halin sa Ozamiz City ang grupo kag ginapahayag nga ang isa sa mga suspek ang naga-apelyido sang Parojinog.
Ginpahayag ni Biñas nga iya na nga ginsapol ang tagsa ka tagdumalahan sang commercial establishment lakip na Philippine National Police tuhoy sa security adjustment nga ipatuman.
Magluwas diri, ginpahayag ni Biñas nga duha sa mga suspek ang natigayon na nila nga makilala apang nagpamalibad ang natungdan nga maghatag sang detalye bangud nga nagapadayon ang ila imbestigasyon.
Sakay sa motorsiklo ang mga suspek sa diin ang isa sa ila ang may warrant of arrest sa Cebu City bangud sa illegal possesion of fire arms.
Mahimo suno kay Biñas nga madugay na ang surveillance sang mga suspek bag-o nagpangawat sa duha ka jewelry store.
