ILOILO CITY- Makabig nga heroic act sa subong nga panahon ang desisyon sang isa ka tawo nga magpabakuna.
Sa interview sang Bombo Radyo kay Dr. Ronnie Samoro, Internal Medicine-Pulmonary Specialist kag katapo sang citizen group nga Bakuna Iloilo, iya ginpahayag nga baganihan ang tawo nga ginaproteksyunan indi lang ang iya kaugalingon kundi ang mga tawo sa iya palibot kag mahimo niya ini kon siya ang vaccinated.
Liwat man nga ginplastar ni Dr. Samoro ang kaimportansya sang paghingalit sa kahigayunan nga mangin baganihan paagi sa pagpatublok sang bakuna nga available kag indi dapat nga mangin pislian sa bakuna.
Suno sa iya, indi mapaktan kon san-o matapikan sang virus ang isa ka tawo gani nakadapat gid nga mahatagan gilayon sang proteksyon ang kaugalingon agud makabato ang lawas sa tion sang COVID-19 infection ukon ano man nga variant sini.
