ILOILO CITY- Hugot ang pagbantay sang mga opisyal sang Calaparan, Arevalo, Iloilo City agud indi makasulod ang mga pangayaw sa mga beach resorts sa lugar.
Ini may kaangtanan sa Executive Order No.29 ni Iloilo City Mayor Jerry Treñas nga nagamando sang pagpasirado sang mga beaches, resorts, kag waterparks sa syudad sang Iloilo tubtob sa Abril 4.
Sa interview sang Bombo Radyo kay Barangay Kagawad Rodrigo Montaño sang Brgy. Calaparan, Arevalo, Iloilo City, iya ginpahayag nga may nakadeploy na nga mga force multipliers, barangay tanods ,Barangay Peacekeeping Action Team, kag mga volunteers agud nga bantayan nga wala sang makasulod nga pangayaw sa mga beaches.
Suno kay Montaño, gin-abisuhan naman ang tagdumalahan sang mga beach resorts nga indi magbaton sang mga pangayaw nga luyag maglagaw kag magpaligo sa baybay.
Gin-athag naman sang barangay official nga hatagan nila sang konsiderasyon ang mga residente sa lugar nga makalakat-lakat sa higad sang baybay apang sa kondisyon nga nagasunod sa minimum health protocol.
