ILOILO CITY – Balantayan subong nga Paraw Regatta Festival ang mga beach sports.
Sa interview sang Bombo Radyo kay Mr. Rudiver Jungco, Sr., Executive Assistance for Youth and Sports, iya ginpahayag nga lakip sa balantayan amo ang beach football, stand-up paddle, beach volleyball, kag frisbee.
Ini ang magasugod sa Sabado, Marso 18 tubtob sa Domingo, Marso 19.
Suno kay Jungco, dululungan nga hiwaton ang apat ka mga sports activities gani, madamo gid sang pili-an ang mga tumalan-aw.
Dugang pa niya, wala sang registration fee para sa mga tagpalasakop nga ang iban sa ila, naghalin pa sa gwa sang syudad.
May yara man sang nagahulat nga mga papremyo para sa mga tagdaog.
Ginklaro man ni Jungco nga may yara ini sang nagaka-igo nga koordinasyon sa Iloilo City Government kag Iloilo Festivals Foundation, Inc.
Nahibaluan nga ang Paraw Regatta Festival nga amo oldest traditional craft event sa Asia kag largest sailing event sa Pilipinas, ang nagsugod na sang Domingo, Marso 12 kag magatakup sa Marso 19.
