Ginpakita sang phenomenal Ilongga kag beauty queen nga si Ayumi Cassandra Zerrudo nga ang pamatan-on subong nga henerasyon puno sang passion kag purpose sa kabuhi.
Si Zerrudo isa ka youth leader, advocate, kag ambassadress nga ang implwensiya indi lamang sa eskwelahan kundi sa komunidad kag sa pungsod.
Siya isa sa mga Outstanding Student Leaders sang Iloilo City kag ginpangunahan ang mga inisyatibo para sa mga pagsanyog sang kaangay niya nga pamatan-on.
Siya man ang nagauyat sang title bilang Miss Philippine Youth Iloilo 2025 Princess.
Sa interview sang Bombo Radyo kay Zerrudo, iya ginpahayag nga bilang isa ka beauty queen kag youth leader, aktibo ini sa pagpakigbahin sa nanari-sari nga mga aktibidad nga nagadul-ong sang kaayuhan sa komunidad.
Suno sa iya, kun paano niya ginahatagan dungog ang titulo kag korona nga iya naangkon, mas ginahatagan sini sang balor ang responsibilidad nga dala sini.
Pahayag niya, paagi sa pagtungod niya sa sini nga responsibilidad, makahatag siya sang inspirasyon kag paglaum sa kabataan kag sa iya komunidad.
Nagapati naman si Zerrudo nga ang abilidad sang isa ka tawo agud mangin maayo nga impluwensya sa iban nga tawo ang ginatakos paagi sa positibo nga impact sa komunidad kag indi paagi lamang sa edad.
Gindugang man sini nga ang tagsa sa pamatan-on may abilidad nga magpamuno kag luyag niya nga mangin instrumento man agud madiskubre sang iban ang ila mga potensyal sa pagpangalagad kag sa iban nga mga patag.
