Nangin ehemplo sang Pinoy pole vaulter nga si Ernest John ‘EJ’ Uy Obiena ang iya mga ginikanan sa pagsulod sini sa patag sang hinampang.
Kilala si EJ Obiena nga tumandok sang Tondo, Manila bilang tiglawas sang Pilipinas sa Tokyo 2020 Olympics sa diin siya lamang ang naga-isahanon nga asyano nga na-qualify sa finals sang men’s pole vault.
Apisar napaslawan nga makakuha sang medalya, nagbubo ang pagdayaw kay Obiena bangud sa iya dako nga effort sa diin naatubang niya ang Olympic gold medalist nga si Mondo Duplantis sang Sweden.
Magluwas sini, naatubang man ni Obiena ang iya man mismo training partner nga si Thiago Braz sang Brazil nga sadto anay nangin gold medalist man sa Rio 2016 Olympics apang, nangin bronze medalist na lang subong nga Olimpyada.
Sa exclusive interview sang Bombo Radyo kay Ma. Jeanette Obiena, iloy sang pole vaulter, iya ginpahayag nga nagdako si EJ sa pamilya nga lunsay athletics, kag ang nag-inspire sa iya amo ang iya amay – isa ka former national record holder nga si Emerson Obiena.
Isa ka sports coach ang iloy ni EJ, record holder man sa pole vaulting ang iya naga-isahanon nga utod kag ang iya amay, isa man ka pole vaulter, silver medalist sa 1995 Southeast Asian Games kag bronze medalist sa 2005 Manila Games.
Suno kay Mrs. Obiena, ang iya amay ang rason kun ngaa na-inlove ang atleta sa pole vaulting sa diin ginlab-ot gid niya ang handom sang iya amay nga makahampang sa Olimpyada.
Sa tion sang mga pagpanghangkat sa iya mga hampang, ilabi na sa iya pinakaulihi nga challenge sa finals sang men’s pole vault sa diin napaslawan ang atleta nga malapawan ang iya world record, bug-os nga suporta kag encouragement sa gihapon ang ginbubo sang iloy para sa iya anak.
Pahayag niya, tuman siya ka proud para sa anak kag ginahatagan man niya ini sang espasyo agud ma-rebuild ang kaugalingon kun yara sa lowest point kag ginapuno man sang positibo nga mga paglaygay.
Sang ginpamangkot naman ang iloy kaangot sa nangin agaw atensyon nga mga medyas ni EJ sa diin naka-imprint ang spongebob squarepants nga cartoon characters nga ginsuksok niya sa finals sang men’s pole vault, ginpahayag sang iloy nga pahanumdom ini ni EJ sa iya kaugalingon nga mag-enjoy lang sa hampang sa tunga sang pressure.
Sa subong, yara pa sa Italya si EJ agud padayunon ang iya nga training para sa mga masunod nga kompetisyon ilabi na para sa Paris 2024 Olympics.
