Nagdako man sa mapintas nga amay, wala ini nangin upang para sa isa ka retired police nga mangin maayo nga amay sa iya apat ka mga kabataan nga lunsay babaye.
Siya si Bernardino Quinto, 65, isa ka retired police, tumandok sang Eastern Samar apang nagaistar na subong sa Arevalo, Iloilo City.
Sa interview sang Bombo Radyo kay Mr. Quinto, iya ginpahayag nga sang siya ang naga-edad siyam ka tuig, nadesisyonan na niya nga maglayas sa ila nga balay bangud sa iya amay nga mapintas kag sa kapigaduhon man sang pangabuhi.
Nagsakay siya sa barko padulong sa Manila kag nagtinir sa iya nga tiyo apang wala wala nangin maayo ang iya sitwasyon.
Liwat siya nga naglayas kag bangud wala sang iban nga kakilala sa Manila, na-eksperyensyahan niya nga magtulog sa bisan diin lang nga lugar kag masami pa nagakagutman.
Suno kay Quinto, apisar nga nagaliho-liho siya sa dalan, may yara siya sang handum nga makaeskwela kag nagpakitluoy sa isa ka manunudlo sa Quezon City nga isa man ka Ilongga nga batunon siya bilang estudyante apisar nga wala siya sang mga dokumento kaangay sang school card.
Bangud nakit-an sang manunudlo nga pursigido kag desidido si Quinto nga maka-eskwela, ang maestra niya mismo ang nagkuha sang iya mga papeles rason nga nakapadayon man siya sa pag-eskwela tubtob high school.
Apisar nga naglayas si Quinto sa iya ginikanan sa Eastern Samar, wala man siya nagakalipat nga magpadala sang sulat.
Bangud nakatapos na siya sang high school, nadesisyonan niya nga magkadto sa Iloilo City bangud may yara siya sang tiya nga may negosyo sa Iloilo Terminal Market (Super).
Gin-agwanta ni Quinto ang pagpas-an sang abuno kag semento bangud ginapaminsar niya nga kun indi siya makatilaw sang pag-antus, wala siya sang dangatan sa ulihe.
Suno sa iya, kun makabatyag siya sang kakapoy, nagatangla na lang siya sa langit , nagapangamuyo kag nagapangayo sang kapag-on.
Wala man napaslawan si Quinto kag naka-eskwela sang technical course sa sulod sang duha ka tuig sa diin na-qualify siya nga makakuha sang NAPOLCOM PNP Entrance Examination kag nakapasar.
Pahayag niya, bata pa lang siya handum na niya nga mangin isa ka pulis bangud ang iya amay ang isa man ka pulis.
Sang nagsulod sa Philippine National Police si Quinto, may yara na siya sang tatlo ka mga kabataan.
Magluwas sa pagka-pulis, ginasiguro ni Quinto nga ginatungdan man niya ang iya mga obligasyon bilang amay sa iya mga kabataan sa diin sugat dul-ong sa eskwelahan ang iya sadto daily routine.
Masami man nga ginalaygayan ni Quinto ang iya mga kabataan nga mangin matutom sa pag-eskwela.
Sa isa ka pamilya, nagapati si Quinto nga may yara gid sang bata nga salawayon kag bangud sini, ginhangkat gid ang iya nga pasensya.
Apang sa baylo nga mag-surrender ang amay sa iya nga anak, mas ginbubo pa niya ang iya nga suporta tubtob nga narealisar sang anak ang iya mga ginhimo kag gintadlong man ang iya nga kabuhi.
Suno kay Quinto, makapila man ka beses nga ginhangkat siya sang tyempo, wala siya nadulaan sang paglaom sa diin diplomasiya ang iya ginadala sa iya mga kabataan.
Fulfilling para sa iya bilang amay nga mapatapos sa pag-eskwela ang iya apat ka mga kabataan kag nabuligan sila nga malab-ot ang ila tagsa ka mga handum.
Isa sa indi malipatan ni Quinto ang nakasulat sa sulod sang napulot niya nga magazine nga nagasiling “Behind those dark clouds, the sun is still shining” nga nangin sandigan sang iya nga kabuhi.
Naglab-ot sa punto sadto sang siya ang lamharon pa nga kada labay niya sa simbahan, ginapangamuyo niya nga mapatay na lang ang iya amay agud mauntat ang ila nga pag-antus.
Apang sang ulihe sang iya nakilala ang Diyos, iya narealisar nga bisan ano kalain sang iya amay, magapabilin ini sa gihapon nga iya “amay.”
Nagpangayo man si Quinto sang kapatawaran sa Diyos nga sang buhi ang iya amay, dumot kag kaakig ang iya nabatyagan.
Bisan ano nga kadulom sang kalangitan pahayag niya, nagapati ini nga may yara sang kasanag sa likod sang paggal-um.
Samtang tuman naman ang pagpasalamat sang isa sa mga anak ni Bernardino Quinto nga si Marinille, bangud makapila man siya mag-fail bilang anak, wala gid nag-surrender ang amay niya sa iya.
