Gin-athag sang Chinese officials nga wala sang dapat kabalak-an ang mga Taiwanese bangud mahimo gihapon sila makabisita sa mainland China.
Kun matandaan, sang nagligad nga semana, ginbalhag sang Beijing ang judicial guidelines sa criminal punishments para sa supporters sang Taiwanese independence. Nalakip diri ang pagdagdag sang death penalty para sa pila ka partikular nga seryoso nga mga kaso nga naga-involve sang “diehard” advocates.
Bilang sabat sa isyu, nagpanawagan ang Taiwanese government sa ila mga pumuluyo nga likawan na ang indi man kinahanglanon nga mga byahe sa mainland China kag pati sa teritoryo sini nga Hong Kong kag Macau.
Ginpasaka man sang Taiwan ang travel warning sini para sa China sa second-highest ukon ang “orange” level.
Apang suno kay Zhu Fenglian, ang spokeswoman para sa Chinese body nga in charge sa Taiwan affairs, ang bag-o nga judicial directives ang naga-target lamang sa gamay lamang nga numero sang supporters sang ‘Taiwan independence’ nga nagahimo na sang malisyoso nga mga akto ukon ang independence separatists.
Nahibaluan nga natabo ang mainland China kag Taiwan split kasunod sang pagtapos sang Chinese civil war sang 1949.
Halin sadto, gina-claim sang China nga kabahin sang ila teritoryo ang amo nga democratic island apang nagapanindugan naman ang Taiwan nga may kaugalingon sila nga gobyerno kag sila ang makabig na nga independent.
