ILOILO CITY – Ginpatpat sang mga eksperto ang nagkalain-lain nga kahulugan kadungan ang pag-umpisa sang “ber months”.
Ang “ber months” amo ang ulihi nga apat ka bulan sang tuig nga nagatapos sa “-ber” sa diin ginalakipan ini sang September, October, November kag December.
Sa interview sang Bombo Radyo kay Dr. Philip Ian Padilla, public health expert, iya ginpahayag nga subong nga “ber months”, indi dapat pagkalipatan nga halungan ang ikaayong lawas.
Suno kay Padilla, bangud wala tuo ang mga parties, mas prone ang mga tawo sa balatian kaangay sang stroke kag heart attack.
Ginpanugyan sini nga subong nga malamig ang tyempo, hingalitan agud makatulog sang mayo kag magkaon sang mga healthy nga pagkaon.
Kun may maayo nga tulog suno sa natungdan, nagabulig ini agud makapanubo sa risgo sang balatian kaangay sang heart disease, obesity, kag type 2 diabetes.
Tion naman subong nga “ber months” agud makapahuway sa stressful nga trabaho kag sa pagtuon.
Sa interview sang Bombo Radyo kay Francis Ray Subong, Registered Guidance Counselor kag Licensed Professional Teacher, iya ginpahayag nga madamo ang excited subong nga mga binulan bangud ini ang panahon agud makatililipon ang mga pamilya kag mga abyan.
Ginpanugyan man sini nga apisar nagakinasadya, nagakadapat man nga mag-angkon sang disiplina ilabi na sa paggasto sang kwarta.
Magluwas diri suno sa natungdan, madamo naman sang mga rehilyoso nga tawo nga nagahulat sa sini nga tion agud saulugon ang pagkabun-ag ni Hesus kag makapangamuyo sang maayo.
Nagapati naman ang isa ka experienced marketing professional nga may maayo nga epekto sa ekonomiya ang “ber months”.
Sa interview sang Bombo Radyo kay Ken Lerona, iya ginpahayag nga nagwa sa isa ka pagtuon nga nagataas sang 40% ang ginapadala sang mga Overseas Filipino Worker (OFW) sa ila mga himata sa Pilipinas.
Suno kay Lerona, subong nga mga binulan, mas madamo ang mga nagagasto nga mga customers kag ginahingalitan naman ini sang mga negosyante bangud mas dako ang demand.
Apang nagpanugyan naman ang natungdan sa mga negosyante nga indi magpatama sang patong sa presyo sang ila serbisyo kag produkto agud magbalik pa ang mga customers.
