Gindesignar ni President Ferdinand “Bongbong” Marcos Jr. ang tatlo ka mga opisyal sang Gabinete nga amo ang mangin caretakers diri sa pungsod samtang didto siya kag si First Lady Liza Marcos sa Vatican.
Ini amo sanday Executive Secretary Lucas Bersamin, Justice Secretary Jesus Crispin Remulla, kag Agrarian Reform Secretary Conrado Estrella III.
Subong nga gab-i ang byahe sang mag-asawa nga Marcos para nga magtambong sa lubong ni Pope Francis nga naka-schedule sa Sabado.
Sa statement sang Malacañang, ginpahayag nga ipalab-ot sang First Couple ang mga pagpangamuyo kag pagdumdom sang mga Pilipino sa Santo Papa ukon ginatawag man nga si Lolo Kiko.
Ginsiling man sang Palasyo nga kaupod ni President Marcos ang ginabanta 170 dignitaries lakip na ang heads of state nga maga-upod sa linibo ka mga tumuluo nga magasaksi sa funeral rites para sa Santo Papa.
Nahibaluan nga subong nga adlaw, nagbyahe naman pakadto sa Roma sanday Catholic Bishops’ Conference of the Philippines President kag Kalookan Bishop Pablo Virgilio Cardinal David amo man si Manila Archbishop Jose Cardinal Advincula. Magluwas nga maga-attend sa lubong, nagahanda man sila sa Conclave ukon ang pagtipon sang College of Cardinals agud magpili sang masunod nga Santo Papa.
Lunes sang gin-anunsyo sang Vatican nga napatay ang Pope sa edad nga 88-anyos bangud sa stroke kag heart failure.#
