ILOILO CITY – Mag-bestfriend na, pareho pa nga topnotchers sa licensure exam.
Ini amo sanday Joshua Aniken Acusta nga rank #1 sa Electronics Engineer Licensure Examination 2023 kag si Dante Robles nga Rank 4 sa Electronics Technician Board Exam.
Ang duha ang lunsay produkto sang Iloilo Science and Technology University.
Sa interview sang Bombo Radyo kay Joshua Aniken Acusta nga tumandok sang Negros Occidental, iya ginpahayag nga inspirasyon niya sa pagkuha sang kurso nga engineering ang iya nga lolo nga isa ka Mechanical Engineer kag amay nga isa ka Electrical Engineer.
Suno kay Acusta, nangin masadya ang iya pagpanglakaton bilang isa ka engineering student bangud nga nabalanse sini ang maayo nga academic performance,social life, kag love life.
Sa subong, interesado ang natungdan nga mag-eskwela para sa master’s degree.
Suno naman kay Dante Robles nga tumandok sang Mina, Iloilo, iya ginpahayag nga bilang mag-bestfriend,dako gid ang nabulig nila sa isa kag isa ilabi na sa pagreview.
Pahayag niya, bentaha gid man nga mga matutom man ang iya mga kaupdanan nga pareho man nga engineering students bangud nangin inspirasyon man nila ang isa kag isa.
