Ginpaguwa na ang ngalan sang bag-o nga legal counsel ni former President Rodrigo Duterte sa kaso sini sa International Criminal Court (ICC).
Ini amo si Peter Haynes, isa ka British barrister kag eskperto sa international criminal defense. Siya ang mangin official lawyer kun aprubahan na sang ICC registry ang formal appointment.
Si Haynes amo ang nagpungko nga presidente sang ICC Bar Association halin sang 2019 tubtub 2021. Siya ang labing-una nga abogado nga na-reelect sa amo nga posisyon.
Ginakonsiderar siya nga isa sa leading practitioners sa international criminal and humanitarian law nga may masobra sa 25 ka tuig nga eksperyensya sa mga korte sa The Hague lakip na ang ICC, ang International Criminal Tribunal para sa former Yugoslavia, kag ang Special Tribunal para sa Lebanon.
Sa iya nga LinkedIn profile, ginlaragway niya ang iya kaugalingon nga “defence trial advocate with substantial experience before both the ad hoc international criminal tribunals and the International Criminal Court (ICC), including ‘the largest criminal trial since the second world war’ (Popovic et al.,). One of the few advocates to have conducted a trial at the ICC.”
Sa ICC, na-representar na sini si former Congolese vice president Jean-Pierre Bemba kag nakabulig para sa iya acquittal sa korte.
“At the ICC, he appeared for Jean-Pierre Bemba, the Minister of Defence and Senator of the Democratic Republic of Congo, famously securing his acquittal of all charges on appeal,” base sa description sang St Philipps Barristers website.
Sang 2024, gin-appoint siya sang ICC agud nga i-represent ang Ugandan militant kag warlord nga si Joseph Kony sa labing-una nga absentia confirmation proceedings sang international tribunal.
Sang ulihi, siya ang nangin lead defense counsel sa September 2025 hearings sa amo nga kaso.
Dugang pa sa St Philipps Barristers website, si Haynes ang “one of the very few practitioners to have led cases before the International Criminal Tribunal for the former Yugoslavia – where he appeared for the defence of General Vinko Pandurević in relation to the Srebrenica massacre – the ICC, and the Special Tribunal for Lebanon.”
Sa Special Tribunal for Lebanon, si Haynes ang nangin abogado sang mga biktima sang Beirut bombing nga amo ang nagpatay anay kay former Lebanese Prime Minister Rafik Hariri.
Ang practice ni Haynes nagalakip sang mga kaso sa genocide, crimes against humanity, war crimes, kag international terrorism.
Ini nga development ang kasunod sang pahayag ni Atty. Nicholas Kaufman nga natapos na ang ila engagement ni Duterte sang Marso kag nakadesisyon naman si Duterte nga magkuha sang bag-o nga abogado para sa trial sang iya kaso.
Sang Mayo 8, sang nag-request si Kaufman nga maga-withdraw siya sa kaso, ginpahayag sini nga napahibalo na si Haynes sang deadlines kag ginpasiguro sini nga magatambong siya sa status conference sa Mayo 27.
“Counsel has spoken to Mr. Haynes, who has indeed confirmed that he is ready, willing, and able to assume immediate representation and that his terms of engagement have been agreed,” pahayag ni Kaufman sa filing.#
