Suportado sang Bureau of Fisheries and Aquatic Resources (BFAR) kag Southeast Asian Fisheries Development Center (SEAFDEC) ang oposisyon sang Iloilo Fish Producers Association sa pagpatukod sang proposed nga oil depot sang Grayhorse Energy Incorporated sa 10-ektaryas nga lote sa Barangay Talusan, Dumangas, Iloilo.
Nahibaluan nga ang 10 thousand square meters nga oil depot ang sarang nga maka-hold sang 27 million liters sang produktong petrolyo.
Sa interview sang Bombo Radyo kay Mr. Tomas Hautea, presidente sang Iloilo Fish Producers Association, iya ginpahayag nga mangin ang BFAR kag SEAFDEC ang nag-upod na sa ila panawagan nga indi na pagdayunon ang pagpatukod sa amo nga oil depot bangud dako ang posibilidad sang kontaminasyon sa tubig ilabi na kun may oil leakage nga matabo nga magaresulta sa pagkaguba sang dunang manggad kag pagkadula sang palangabuhian sang madamo nga mga fisherfolks.
Suno kay Hautea, sa tion nga matabo ini, indi lang ang bug-os nga Dumangas, Iloilo ang maapektuhan kundi pati na ang Buenavista, Guimaras, Zarraga kag Leganes, Iloilo.
Dugang pa sang natungdan, may patigayunon pa man nga committee hearing angot sa pagatukuron nga oil depot kag nagalaom sila nga mabinag-binag sang maayo sang Department of Environment and Natural Resources kag sang lokal nga mga opisyal sang banwa sang Dumangas, Iloilo ang mga rason kun ngaa hugot ang ila pagpamatok sa ginaduso nga oil depot.
