Ginalantaw sang Bureau of Fisheries and Aquatic Resources (BFAR) Region 6 nga isa ka aksidente ang natabo sa pulis nga naglagas sa mga illegal fishers kag nahulog-patay sa Guiwanon, Nueva Valencia, Guimaras.
Ang biktima sa amo nga insidente amo si Police Staff Sergeant Mechael Gatinao, 42-anyos, kag residente sang Sitio Sirum, Brgy. San Nicolas, Buenavista Guimaras.
Sa interview sang Bombo Radyo kay Remia Aparri, Regional Director, Bureau of Fisheries and Aquatic Resources, iya ginpahayag nga kabalo ang mga law enforcement officers ukon kapulisan sang mga protocol kon magapatrolya sa kalalawran.
Suno kay Aparri, ang masami nga nagaluntad nga insidente ang indi ma-control rason nga nagakatabo.
Gin-athag man sini nga ang pagpatrolya sang mga kapulisan kag bantay dagat sa amo nga tion ang kontrolado sang Local Government Unit sang Nueva Valencia.
Ginpanginwala man sang natungdan nga imbolbado ang ahensya sa ginpatuman nga pagpatrolya nga ginkamatay ni Gatinao.
Wala man nagapati si Aparri nga halin mismo sa bulsa sang mga kapulisan kag bantay-dagat ang gasolina nga ginagamit sa pagpatrolya bangud naga-alokar ang LGU sang amo nga banwa sa pagpatughong sang sakayan.
