Ginbungguan kag gingamitan pa sang water cannon sang mga barko sang Chinese Coast Guard (CCG) ang vessel sang Bureau of Fisheries and Aquatic Resources (BFAR) nga BRP Datu Sanday malapit sa Escoda ukon Sabina Shoal sa West Philippine Sea kaina sang hapon, Agusto 25.
Natabo ini sang naghalin ang BRP Datu Sanday sa Hasa-Hasa Shoal kag magadul-ong kuntani sang diesel, pagkaon, kag medical supplies sa mga Pilipino nga manugpangisda sa Escoda Shoal.
Nahamtang ang Hasa-Hasa ginabanta 60 nautical miles halin sa Rizal, Palawan; samtang ang Escoda Shoal naman ang yara sa 110 nautical miles halin sa mainland kag pareho nga sulod sa exclusive economic zone sang Pilipinas.
Nakit-an sa videos sang Philippine Coast Guard (PCG) nga hungod nga ginbungguan sang CCG Ship 21551 ang BRP Datu Sanday samtang nagatamwa naman ang pila sa ila nga mga personnel kag naga-video man sa insidente.
May videos man sang naggamit na ang CCG ship 4102 sang water cannon agud bombahan sang tubig ang BRP Datu Sanday samtang pakadto sa shoal. Magluwas diri, anum pa gid ka iban nga CCG vessels ang naggamit man sang water cannons batok sa vessel sang Pilipinas.
Sa statement sang state broadcaster sang China nga CCTV, ginpahayag nga ang Philippine vessel ang iligal nga nagsulod sa dagat nga malapit na sa Xianbin Reef sa Nansha Islands nga wala sang pahanugot halin sa Chinese government. Ang ginpangmitlang sini nga pangalan amo ang Chinese names para sa Sabina Shoal kag Spratly Islands.
Sa statement naman nga gin-release sang National Task Force-West Philippine Sea (NTF-WPS), ginkumpirma nga walo gid ka maritime vessels sang People’s Republic of China (PRC) ang naka-engkwentro sang BFAR vessel.
Ginsaad sa statement nga ang tuyo sang China amo nga balabagan ang vessel sang Pilipinas sa amo nga humanitarian mission apang bangud sa amo nga delikado nga aktwasyon, nagtuga ini sang engine failure sa barko sang Pilipinas rason nga ginpaiway na lang anay ang misyon.
“The [Chinese Coast Guard] vessels made close perilous maneuvers that resulted in ramming, blasted horns, and deployed water cannons against the BFAR vessel, eventually leading to the latter’s engine failure and forcing an early termination of the humanitarian operation. These unprofessional, aggressive, and illegal actions posed serious risks to the safety of the Filipino crew and the fishermen they were meant to serve,” kabahin sang statement sang NSC.
Apisar sang encounter, safe ang tanan nga crew nga sakay sa BRP Datu Sanday.
Lakip sa nagpanguna sa pagkondena sa amo nga insidente amo ang Estados Unidos sang Amerika kag ang European Union.
