ILOILO CITY– Bukas ang Bureau of Fire Protection nga ipaidalom sa imbestigasyon ang duha ka mini- fire trucks nga ginhatag sadtong panahon pa sang administrasyon ni anay Iloilo City Mayor Jose Espinosa III.
Ini matapos ginduso ni Iloilo City Mayor Jerry Treñas nga ipausisa ang nasambit nga mga firetrucks bangud nga ginaalegar overpriced.
Sa interview sang Bombo Radyo kay Fire Chief Inspector Christopher Regencia, Iloilo City Fire Marshall, iya ginpahayag nga may ginauyatan man sila nga mga papeles gani wala sang problema kun paimbestigaran ini sang alkalde.
Apang, ginpahayag ni Regencia nga kun presyo ang pagahambalan, wala ini sang ihibalo bangud ang local government unit na ang nagpatigayon sang procurement.
Suno pa kay Regencia, ginbaton nila ang nasambit nga mga firetrucks agud magamit sa pagpenetrate sa mga makitid kag suludlon nga lugar.
