Nagasentro karon ang imbestigasyon sang Bureau of Fire Protection (BFP) sa ika-duha nga panalgan sang balay sang pamilya Reyes kon sa diin, ginalantaw nga nagsugod ang sunog sa Zone 6, Brgy. Infante, Molo, Iloilo City.
Ang mga biktima amo ang mag-asawa nga sanday Julius Reyes kag Louelyn Reyes nga pareho nga manunudlo sa Iloilo City, kag ang ila anak nga si Amber Marie, pito ka tuig.
Sa interview sang Bombo Radyo Fire Superintendent Melanie Habawel, Iloilo City Fire Marshal, iya ginpahayag nga may patimaan nga ang kalayo ang nag-umpisa sa ika-duha nga panalgan sang balay.
Suno kay Habawel, may nakit-an nga abo nga nagahatag sang simbolo nga nauna ini sunog antes pa man naglapta ang kalayo.
Ginpahayag man sini nga ang kalayo ang nagsaka sa atop sang balay tubtob nga naglapta.
Dugang pa ni Habawel, nagakuha na sila sang dugang nga mga ebidensya agud nga matul-id ang ginhalinan sang sunog.
Plano man nga magkuha sang sample sang mga debris agud nga mapaidalom sa tests kag kon mahibaluan kon may foul play nga natabo.
Una na nga gintuad sang otoridad nga human sa light materials ang balay rason nga madasig man ini nga ginlamon sang kalayo.
