ILOILO CITY – Gin-ako sang Bureau of Fire Protection-Iloilo City nga kulang ka tama ang ila equipment kag personnel ilabi na nga sa ila gintugyan ang trabaho sang Iloilo City Emergency Responders.
Ini ang kasunod sang pagpositibo sa Coronavirus Disease 2019 (COVID-19) sang isa ka ICER personnel rason nga ginpauntat anay ang ila trabaho.
Sa interview sang Bombo Radyo kay Fire Chief Inspector Melanie Habawel, city fire marshall, iya ginpahayag nga sa subong, skeletal force lang ang naga duty kag isa lang ang ambulance nga ila ginagamit.
Magluwas diri suno kay Habawel, kulang man ang Personal Protective Equipment nga mahimo magamit sang mga BFP personnel kag antes pa man makaresponde sa masunod nga emerhensya, kinahanglan anay nga i-disinfect ang ambulansya kag iban pa nga equipment nga gingamit.
Ang nasambit nga mga rason suno kay Habawel ang makaapekto sa pagresponde ilabi na kun madamo ang emergency call rason nga first come first serve basis na lang ang sundon.
Sa pihak sini, ginpahayag sang natungdan nga ila pangitaan sang paagi agud nga masulusyunan ang nasambit nga mga kakulangan.
