Nagpahanumdom ang Bureau of Fire Protection-Iloilo City sa publiko nga magdoble sa paghalong agud malikawan ang sunog, ilabi na gid subong nga tuman ka init ang tyempo.
Ini bangud man sa sunod-sunod nga sunog nga nagluntad sa syudad sang Iloilo.
Sa interview sang Bombo Radyo kay Senior Fire Office 1 Den Mark Macoco, chief investigator sang Intelligence Unit sang Iloilo City Fire Station, iya ginpahayag nga sa bulan sang Abril, naka-record na sang 19 ka insidente sang sunog ang siyudad, samtang naglab-ot naman sa 67 ang kabug-usan nga kaso halin sang Enero sini nga tuig.
Suno sa iya, ang mga nagapanguna nga rason sang sunog amo ang electrical problems kag bangud sa napabayaan nga linuto.
Dugang pa niya, mas mataas ang na-record nga kaso sang sunog sa first quarter sang subong nga tuig kun ikumpara sang 2025.
Isa sa mga problema nga ginaatubang sang BFP amo ang late nga pag-inform sa ila kun may nagluntad nga sunog, gani ginapanawagan nila sa publiko nga mag-report gilayon agud malikawan ang pagdako sang kalayo.
