Nagpaandam ang Bureau of Fire Protection (BFP) Iloilo City batok sa paghupot sang mga palupok sa sulod sang balay kasunod sang pagselebrar sang Bag-ong Tuig.
Sa interview sang Bombo Radyo kay Senior Fire Officer 1 Denmark Macoco, acting chief sang Intelligence and Investigation Unit sang Iloilo City Fire Station, iya ginpahayag nga delikado ang pagtago sang mga palupok bangud mahimo ini tunaan sang sunog.
Ginpaanggid niya ini sa paghupot sang time bomb nga wala mahibaluan kun san-o magsigabong.
Nagpanugyan si Macoco nga indi na maghulat sang masunod nga New Year kag sa baylo, i-dispose na lang, ilubong, kun i-surrender ang nabilin nga mga firecrackers.
Nagpahanumdom man ini sa mga kabataan nga indi pagpuluton kag tipunon ang mga wala naglupok nga mga firecrackers nga gingamit sa pagsug-alaw sang Bag-ong Tuig.
Nahibaluan nga antes ang New Year celebration, mas ginpasangkad man sang bureau ang ila kampanya kag panawagan sa publiko batok sa iligal nga mga palupok, kag nag-conduct man sang inspeksyon sa mga designated firecracker display and selling areas sa syudad agud masiguro ang pag-comply sa fire safety standards kag masunod ang mga regulasyon sang local government.#
