Nagpaandam ang Bureau of Fire Protection (BFP) sa publiko kaangot sa ginaantisipar nga pagsaka sang kaso sang fire incidents sa rehiyon kadungan sang El Niño phenomenon.
Sa interview sang Bombo Radyo kay Fire Chief Inspector Reynan Gecana, ang Chief sang Operations Division sang BFP Western Visayas, iya ginpahayag nga sa dry season kun sa diin sunod-sunod nga bulan nga halos wala sang ulan, madasig nga maglapta ang kalayo ilabi na sa laya nga mga hilamon kag mga sanga sang kahoy.
Suno kay Gecana, bilang kabahin sang paghalong sa palibot, dapat nga likawan gid ang pagpanutod ilabi na ang nakaandan nga pagsunog sang basura kun wala ini nakuha sang kolektor.
Nagpahanumdom man si Gecana nga indi maghaboy sang upos sang sigarilyo bangud nga posible ini nga makatuga sang grassfire.
Sa sulod sang balay naman, dapat suno sa iya nga mangin alerto gid kaangot sa electrical safety — likawan ang overloading, gabuton ang appliances nga wala gina-gamit, mag-inspeksyon sa mga wiring, bantayan ang mga linuto, kag indi pagbayaan nga nakasindi ang kandila.
Nahibaluan nga sang tinalikdan nga mga tinuig, may mga na-rekord nga grass fire incidents sa Iloilo kun sa diin ginaangot man sa tuman ka taas nga temperatura.
Sang 2024, magluwas sa extreme weather dala sang El Niño, isa man sa gin-raise nga concern sang BFP amo ang problema sa response and rescue efforts sa fire incidents nga apektado man bangud sang kakulangan sang suplay sa tubig.#
