Nagpahanumdom ang Bureau of Fire Protection sang importansiya sang paglikaw sa sunog ilabi na sa nagahilapit nga Fire Prevention Month sa Marso.
Sa interview sang Bombo Radyo kay Senior Fire Officer 4 Maria Joy Denaga, Acting Chief Admin sang Iloilo City Fire Station, iya ginpakigbahin ang mga kinahanglan nga mga ubrahun agud malikaw sa mga fire incident:
*Kinahanglan nga napatay ang mga appliances kun matulog na ukon may kadtuan
*Mangin responsable sa paggamit sang kandila
*Siguraduhon nga indi pagbayaan ang ginaluto sa kusina
*Kinahanglan nga matinlo kag wala sang lapta sa sulod sang balay
*Dapat may ara sang plano nga fire exit ang isa ka pamilya sa ila puluy-an
Suno pa kay Denaga, ila man nga ginasiguro nga kun may ara sang nagaluntad nga sunog, indi lang ang BFP ang first responder.
Ini bangud sa ila Oplan Ligtas na Pamayanan Program, tinutuyo nila nga hatagan sang training ang mga barangay sa siudad agud ila mahibal-an ang mga nagakadapat nga mga tikang agud matapna kag malikawan ang sunog.
