ILOILO CITY–Madamu sang nangin upang sa pagresponde sang Bureau of Fire Protection (BFP) sa Sitio Malipayon, Brgy. MH Del Pilar, Jaro, Iloilo City.
Sa interview sang Bombo Radyo kay Fire Chief Inspector Christopher Regencia, City Fire Marshall, iya ginpahayag nga ang mga pumuluyo sa lugar mismo ang rason kun nga-a madamu nga balay ang nasunog sa diin tatlo ang patay.
Sa pagpaathag ni Regencia, gilayon sila nga nakaresponde sa firecall nga ila nabaton apang naulihi ang ila nga pagpapas sang nagadaba-daba nga kalayo.
Ini bangud nga sa ila nga pag-abot sa lugar, nagapatig-agaw ang mga pumuluyo nga sila ang magaplastar sang hose.
Bangud nga wala man sang ihibalo sa fire fighting, lain nga direksyon ang ginatup-an sang tubig.
Pila man ka minutos suno kay Regencia ang nauyang bangud sa pagpatig-agaw sang mga pumuluyo.
Nahangpan man ni Regencia nga luyag sang mga pumuluyo nga makabulig apang indi lang kuntani pag-agawan ang mga bombero bangud nga sila ang may ihibalo sa firefighting.
Magluwas diri, tama man ka kitid sang dalan pasulod sa lugar nga gindugangan pa sang mga salakyan nga nakaparking sa higad sang dalan.
Samtang, ginkumpormihan ni Punong Barangay Larry Palomo  sang nasambit nga lugar ang pahayag ni City Fire Marshall Fire Chief Inspector Christopher Regencia nga madamu double-parking sa dalan sa ila lugar.
Ini ang rason kun nga-a nabudlayan ang Bureau of Fire Protection (BFP) sa pagresponde sa sunog.
Sa interview sang Bombo Radyo kay Palomo, iya ginpahayag nga matuod gid man nga madamu sang mga pumuluyo sa ila lugar ang nagapanag-iya sang salakyan apang wala man sang garahe.
Kuntani suno kay Palomo, indi paghimuon nga parking lot ang dalan bilang pagpanghanda man sa tion nga may sunog ukon ano man nga emerhensya.
Matapos ang natabo nga sunog, luyag ni Palomo nga magtukod sang Barangay fire brigade agud nga makabulig man sa tion sang sunog.
Kadungan sini, ginpanugyan man sang Punong barangay sa tanan nga kuhaon sa saksakan ang appliances nga wala man lang ginagamit.