Ginkumpirmar sang Bureau of Fire Protection (BFP) Pavia nga halin sa ginaluto sa kusina sang balay sang pamilya Catolico ang gintunaan sang sunog nga natabo sang Domingo sang aga, Abril 19, sa Purok 2, Pavia, Iloilo.
Sa interview sang Bombo Radyo kay FSInspector Mary Angelie Jala, Fire Marshal sang BFP Pavia, iya ginpayag nga bangud man sa mahangin nga tyempo gilayon nga naglapta ang kalayo sa bilog nga balay.
Suno pa sa iya nga bangud human sa light materials ang balay kag medyo daan na ini nangin madali ang pagkaon sang kalayo sa kagamitan sa sulod sini.
Nag-lab-ot naman sa masobra ₱224,000 ang kabug-usan nga halit sang sunog kun sa diin nalakip ang isa ka repair shop kag amo man ang photoshop nga tupad sini.
Samtang, gin-athag sang Bureau of Fire Protection (BFP) Pavia nga duha ka minutos lamang ang ila response time matapos sila gin-inform nahanungod sa nagluntad nga sunog sa balay sang Pamilya Catolico, sa Purok 2, Pavia, Iloilo.
Sa interview sang Bombo Radyo kay FSInspector Mary Angelie Jala, Fire Marshal sang BFP Pavia, iya ginpahayag nga wala sila sang nabaton nga tawag ukon mensahe halin sa publiko nga nagpa-lab-ot sang impormasyon nahanungod sa sunog.
Suno sa iya, alas-8:09 sang aga sang may nag-walk in sa ila estasyon kag nagpahibalo nga may nagluntad nga sunog kag insigida alas-8:11, naggwa gilayon ang ila team agud magresponde sa lugar.
Ginpahayag man ni Jala nga bisan malapit lamang ang estasyon sa ginsunugan, wala sang may nagpalab-ot sang impormasyon sa ila rason nga sang nag-abot ang mga bombero sa lugar, dako na ang kalayo.
Dugang pa niya, ginabanta nga lima tubtob napulo ka minutos na nga nagasugod ang sunog antes pa ini nahibaluan sang BFP.
Nagapanawagan ang BFP Pavia sa publiko nga kun may emerhensya, gilayon nga magtawag sa emergency hotlines agud mapadasig ang pagresponde kag malikawan ang mas dako nga halit sang sunog.
