ILOILO CITY- Ginkumpirma sang Local Government Unit sang Malay, Aklan nga nagpadulong sa isla sang Boracay sang personnel ang Bureau of Fire Protection- Region 6 nga nagpositibo sa Coronavirus disease 2019(Covid-19) apisar wala pa natapos ang iya quarantine.
Sa interview sang Bombo Radyo kay Mayor Frolibar Bautista sang Malay, Aklan, iya ginpahayag nga Hunyo 12 sang nagsulod sa isla sang Boracay si WV 144, isa ka 26 anyos nga personnel sang nasambit nga ahensya sa diin upod niya ang kapin 30 ka mga katapo sang Bureau of Fire Protection- Region 6 kag upod pa si Regional Director Fire Senior Supt. Roderick Aguto.
Suno kay Bautista, Hunyo 14, ginabanta ala-una sang hapon sang nagpull-out ang grupo apang wala pa nahibaluan kun sa diin nagtinir ang mga ini sa sulod sang duha ka adlaw.
Sa subong suno sa alkalde, padayon ang contact tracing sa mga tawo nga posible naka-close contact sang nasambit nga BFP personnel.
Paimbestigaran man sang alkalde ang nasambit nga insidente kag desidido ini nga magpasaka sang kaso kun mapamatud-an nga may breach of protocol, may paglapas ang ahensya sa Bayanihan to Heal as One Act, kag kun may natabo nga pagpangsabotahe ilabi na nga subong nga adlaw, Hunyo 16, ang reopening sang Boracay para sa bilog nga Western Visayas.
Sa pihak sini, ginpat-ud ni Bautista nga magapadayon sa gihapon ang operasyon sang isla para sa mga turista bilang kabahin sang liwat nga pagbuhi sa sektor sang turismo sa Rehiyon 6.
