Iloilo – Ginkadismaya sang Bureau of Fire Protection Region 6 ang asud-asud nga sunog sa Iloilo City apisar sang kampanya kag pagpahanumdom sang mga ini sa publiko.
Ini matapos ang nagluntad nga sunog sa distrito sang Lapuz sa magkasunod nga adlaw apisar sang pag-obserbar sang Fire Prevention Month subong nga Marso.
Sa interview sang Bombo Radyo kay Fire Chief Superintendent Atty. Jerry Candido, director sang Bureau of Fire Protection VI, iya ginpahayag nga gina-engganyo sini ang publiko nga mag-execute sang exit drill sa tagsa ka mga panimalay sa tion sang emerhensya.
Suno kay Candido, antes bayaan ang balay, nagakadapat nga tsikyaron ang palibot kag taguon ang mga highly flammable materials kaangay sang posporo, kandila, kag charger nga indi malab-ot sang kabataan.
Ginpahayag dugang sang natungdan nga mayor nga kabangdanan sang sunog sa syudad amo ang ‘electrical in nature’.
Nahibaluan nga may yara sang 20 ka mga narekord nga fire incidents sa Iloilo City humalin sang Marso 1 tubtob 19.
Sa numero nga ini, siyam ang residential, anum ang grass fire, tatlo ang pole fire, isa ang rubbish fire, kag isa ang miscellaneous.
Nagapadayon naman ang Bureau of Fire Protection Region 6 sa pagpalapnag sang impormasyon natuhoy sa fire safety tips sa publiko.
