Nagaplano ang Bureau of Fire Protection Region 6 (BFP-6) nga magpahamtang sang fire hydrants sa fire prone areas sa Western Visayas.
Sa interview sang Bombo Radyo kay Fire Senior Inspector Michael Lopez, Acting Chief sang Logistics Division sang Bureau of Fire Protection Region 6, iya ginpahayag nga ang tikang ang may tuyo nga mapa-intensify ang fire prevention campaign sa rehiyon.
Suno kay Lopez, luwas sa hydrants, may ginapatuman man sila nga fire information campaign agud ma-edukar ang mga residente sa pagtapna sang kalayo.
Nagahiwat man sang fire brigade trainings sa tagsa ka mga barangay agud mahanas ang ikasarang sang mga pumuluyo.
Nagakoordinar naman sa tagsa ka Local Government Unit (LGU) ang mga Fire Marshals sang BFP agud nga maplanohan sang maayo ang pagbutang sang mga fire hydrants.
