BFP Region 6, may bag-o nga Regional Director; FSSUPT. Aguto, naghalin ukon ginpahalin sa pwesto?

ILOILO – Nadugangan sang tatlo ka kaso sang Coronavirus Disease 2019 (COVID-19) ang Western Visayas.

Sa press briefing sang Department of Health Region 6, gin-anunsyar ang tatlo ka mga panibag-o nga kaso nga amo sanday;

*WV 154 – 19 anyos nga Babaye taga Cauayan, Negros Occidental kag isa ka locally stranded individual
*WV 155 – 24 anyos nga Lalaki taga Escalante City, Negros Occidental kag;
*WV 156 – 30 anyos nga Lalaki taga Hinobaan, Negros Occidental , isa ka locally stranded individual

Samtang may yara na sang bag-o nga Regional Director ang Bureau of Fire Protection Region 6 matapos nga naghingyo sang relief si Fire Sr. Supt. Roderick Aguto.

Sa interview sang Bombo Radyo kay Fire Sr. Insp. Stephen Jardeleza, tagpamaba sang Bureau of Fire Protection 6, iya ginpahayag nga naghingyo si Aguto nga maghalin sa pwesto bilang regional director matapos nga naangot ang iya pangalan sa kontrobersiya sang isa ka covid-19 positive nga personnel sang ahensya.

Ang magatal-os kay Aguto bilang regional director amo si Fire Sr Supt Jerry Candido nga isa ka abogado kag tumandok sang syudad sang Iloilo.

Nakapasa naman ang Bureau of Fire Protection Region 6 sang incident report sa Department of Health Region 6.

Sa incident report sang Bureau of Fire Protection, wala naka-upod ang COVID-19 positive sa isla sang Boracay baliskad sa ginkumpirma sang Malay, Aklan Local Government Unit.

Bangud sa nagkalain-lain nga impormasyon, padalman kag imbestigahan sang Department of Health Region 6 ang nasambit nga isyu.

Sa interview sang Bombo Radyo kay Iloilo City Police Office Director PCol. Eric Dampal, iya ginpahayag nga wala pa nakapasa ang ila talatapan sang imbestigasyon kay Iloilo City Mayor Jerry Treñas batuk sa isyu nga ginaka-ulamiran sang Bureau of Fire Protection Region 6 .

Sa pihak nga bahin, ginpahayag ni Dampal nga indi man tuman nga apektado ang operasyon sang kapulisan apisar sa pagpositibo sa COVID-19 sang duha ka mga pulis nga sanday WV 149, naka-designar sa barangay hall sang Q. Abeto, Mandurriao, Iloilo City samtang si WV 151 ang naka-designar sa Mandurriao Public Market.

Gin-lockdown naman ang Barangay Hall sang Q. Abeto, Mandurriao, bangud sa pagpositibo sa COVID-19 sang isa ka pulis nga na assign sa nasambit nga barangay.

Suno kay Punong Barangay Ramon Amoroso, ang mga naka close contact kay WV 149 ang nagapabilin sa barangay hall nga ginagamit bilang facility quarantine samtang nagahulat sang resulta sang real-time reverse transcription polymerase chain reaction (rRT-PCR) test.

Ang ginakabalak-an subong sang punong barangay amo ang ila nga pagkaon samtang naka quarantine.

Sa subong, padayon nga ginakuhaan sang swab sample para sa covid-19 testing ang mga katapo sang Philippine National Police, mga market vendors, tricycle kag trisikad drivers kag mga personnel sa pagpagtag sang social amelioration program sa distrito sang Mandurriao nga naka close kag moderate contact sang duha ka mga pulis nga nagpositibo sa COVID-19.

Sa interview sang Bombo Radyo kay Chiqui Blancaflor, head COVID-19 extraction team, iya ginpahayag nga masobra 300 na ang nakuhaan sang swab samples para sa covid-19 testing.

Sa bahin sang COVID-19 positive nga personnel sang BFP-Region 6, kabug-osan nga 291 tanan ang nakuhaan sang swab samples para sa covid-19 testing kahapon kag naka-quarantine sila subong sa isa ka hotel sa syudad.