ILOILO – Nagpanugyan ang Bureau of Fire Protection Region 6 nga likawan ang tanan nga sahi sang palupok sa pagsug-alaw sa bag-ong tuig.
Sa interview sang Bombo Radyo kay Fire Senior Supt. Jerry Candido, Regional Director sang Bureau of Fire Protection 6, iya ginpahayag nga may yara sila sang pagsulundan nga ipatuman agud malikawan ang mga pagluntad sang sunog tuga sang mga palupok.
Ini nga pagsulundan amo ang Oplan Iwas Paputok sa diin ginadumili ang tanan nga sahi sang mga palupok sa new year celebration.
Suno kay Candido, apisar naandan na sang pumuluyo ang magpalupok, kalalat-an lamang ang tuga sini.
Kun indi gid malikawan suno sa natungdan, mahimo nga magpalupok kun adlaw lamang kag siguraduhon nga sa wayang ukon open space.
Gin-abisuhan man ni Candido ang may panimalay nga human sa light materials nga kun mahimo basa-on ang atop kag dingding agud indi mahapos nga dutlan sang kalayo.
