Naghatag na sang kumpirmasyon ang Bureau of Immigration (BIO) kag ang Presidential Anti-Organized Crime Commission (PAOCC) nga nakaguwa na matuod sa Pilipinas si dismissed Bamban, Tarlac Mayor Alice Guo ukon ang Chinese national nga si Guo Hua Ping nga nagapangatubang sa sampaw-sampaw nga mga kaso bangud sa kaangtanan sini sa iligal nga Philippine Offshore Gaming Operators (POGO).
Suno sa PAOCC, base sa immigration records sang ila foreign counterparts, nag-abot si Guo sa Kuala Lumpur, Malaysia halin sa Denpasar, Indonesia sang Hulyo 18, 2024, kag sunod nga nagbyahe pa-Singapore sang Hulyo 21.
Ginpahayag man sang ahensya nga nag-abot ini sa Batham, Indonesia halin sa Singapore sang Agusto 18 sakay sa ferry boat.
“July 18 she arrived in Kuala Lumpur from Denpasar, Indonesia via Batik Air 177. July 21 she arrived in Singapore from Kuala Lumpur via Jetstar Asia 686. August 18 she arrived in Batham, Indonesia from Singapore via ferry boat,” sandig sa statement sang PAOCC.
Kun basehan naman ang statement ni Immigration Commissioner Norman Tansingco, nagguwa sa Pilipinas si Guo nga wala na nag-agi pa sa immigration authorities sang pungsod.
Base ini sa intelligence report sang Bureau of Immigration (BI) suno kay Tansingco.
Pahayag pa sini, base sa ila nga intel report, iligal nga nagbyahe ang kontrobersyal nga dismissed mayor sa Malaysia sang Hulyo kag sunod nga naglupad pa-Singapore kaupod si Sheila Guo kag Wesley Guo sang Hulyo 21.
Dugang ni Tansingco, apisar nga nalista ang pangalan ni Guo sa immigration lookout bulletin sang Department of Justice (DOJ), wala na-rekord ang iya departure sa immigration system kag centralized database.
Nahibaluan nga ang BI ang may presensya gid sa tanan nga regular international ports of entry and exit kaangay sang international airports kag seaports kun sa diin ang informal exit points ang gina-manage kag gina-monitor sang iban nga aviation ukon maritime agencies.
Ang kumpirmasyon sang duha ka ahensya ang nagguwa kasunod sang ginbuyagyag ni Senator Risa Hontiveros sa Senado subong nga adlaw nga nakabiya si Guo sa Pilipinas gamit ang iya Philippine passport.
Sa ginbuyagyag ni Hontiveros, nakasaad nga nagkadto ang amo nga Chinese national sa Singapore agud makigkita sa iya amay nga si Guo Jian Zhong, iloy nga si Lin Wen Yi, uto nga nga si Wesley Ong kag Cassandra Ong nga amo ang ginhingadlan nga representative sang Lucky South 99, ang POGO hub nga gin-raid sa Porac, Pampanga.
“Tumuloy si Alice Guo sa Singapore, kung saan nag tagpo tagpo sila ng kanyang magulang na sina Lin Wen Yi at Guo JIanZhong. The couple flew in from China on July 28, 2024. Mistulang reunion sila doon kasama sina Wesley Guo at si Cassandra Ong,” pahayag ni Hontiveros.
Nagapati man ang senadora nga may tawo sa gobyerno nga nagbulig para mapapalagyo ang anay alkalde.
“Who allowed this travesty to happen? Sino ang may kagagawan nito? Hindi makakaalis si Alice Guo kung walang tumulong sa kanya na mga opisyales ng pamahalaan,” pamangkot sini sa isa ka privilege speech.
Diri na kag ginplastar ni Hontiveros ang punto nga indi lang si Guo ang imbestigaran kundi pati ang law enforcement agencies.
“Para tayong ginisa sa sarili nating mantika. I have always believed that legislative hearings are policy-driven kaya noong nag announce na ng ban ang Pangulo, sabi ko, we have done our jobs, let law enforcement take the lead.”
“Pero paano kung ang law enforcement mismo ang kelangan imbestigahan? What if they dropped the ball? Paano kung sila ang dapat managot? Nangako ang BI sa akin at sa Senate President Pro Tempore na hindi nila hahayaan si Guo Hua Ping na makaalis sa Pilipinas, eh yun pala ay wala na talaga siya,” dugang sini.
Sa inisyal nga statement sang Department of Justice (DOJ), ginsiling ni Justice spokesperson Atty. Mico Clavano nga pasabton ang mga tawo nga yara sa likod sang pagpalagyo ni Guo.
“This is a case of national significance. Thus if it is indeed true that Alice Guo has left the country, a thorough investigation is needed to hold those responsible accountable. This is not a light matter,” pahayag sini.#
