ILOILO CITY – Ginakabig sang isa ka pulis nga pinakamataas nga armas ang pagdala sang bibliya sa tagsa ka adlaw.
Sa Good Morning Philippines program, ginpahayag ni Police Executive Master Sergeant Cesar Pinuela, Pinuno sang Police Community Relations sang Jaro Police Station, nga ang pagdala sang bibliya sa trabaho ang naandan na niya.
Suno kay Pinuela, antes mag-umpisa ang opisina sa tagsa ka aga, nagapatigayon anay sila sang pagpangamuyo kag sa tagsa ka Miyerkules, may yara naman sang ginapatigayon nga bible study.
Ginpahayag ni Pinuela nga ang trabaho sang pulis ang indi lamang paisog-isog kundi dapat nga mangin God-centered, family based kag service oriented.
Bilang pinuno sang Police Community Relations sang Jaro Police Station, ginpahayag sang natungdan nga iya gid nga ginapangamuyu-an ang mga preso nga malampuwasan ang mga pagtilaw sa kabuhi kag mabag-o ang tiko nga paminatasan.
Magluwas sa ila police station, ginpahayag ni Pinuela nga sa tagsa ka symposium nga ginapatigayon, iya gid nga ginapahangop nga dapat nga mangin sentro sang pagpangabuhi ang Ginuo.
Nahibalu-an nga ang nasambit nga buluhaton ni Pinuela ang nag-angkon sang nanari-sari nga pagkilala.
