Ginbali ni Senate President Francis “Chiz” Escudero ang mga alegasyon sang kampo ni former President Rodrigo Duterte nga may mga blangko nga items sa bicameral conference committee report sa 2025 national budget.
Suno kay Escuero, wala siya sang ihibalo kun ano nga report ang ginpakita ni Davao City 3rd District Representative Isidro Ungab nga kaupod ni Duterte. Pahayag sini, indi maayo nga mang-akusar nga blangko nga items sa report sang bicam bangud lunsay lang ini kabutigan.
“Anuman ‘yung pinapakita niyang committee report o diumanong bicameral conference committee report… hindi ko nakikita ‘yung pirma ko dun so hindi ko alam kung ano yun,” suno kay Escudero. “Hindi tama na mag-akusang may blank check na binigay ang Kongreso, mali yun. Kasinungalingan yun at hindi totoo yun.”
Dugang sang senate president, ang bicam report nga iya ginpirmahan ang may probisyon nga nagatugot sa committee on appropriations and finance nga i-correct kag i-fill in ang items nga posible na-overlook. Ginpahayag sini nga may 200,000 line items sa amo nga budget measure.
Ginpahangop man ni Escudero kun may probisyon sa bicam report nga nagasaad nga kun may deperesensya sa General Appropriations Act (GAA) kag sa bicam report, ang dapat sundon amo ang enrolled copy sang GAA.
Sa tunga sining mga alegasyon, ginpahayag ni Escudero (nga isa man ka abogado) nga ang bersyon sang budget nga mahimo lamang makwestyon amo ang napirmahan na sang presidente.
“Ang batas ay yung pinirmahan na enrolled copy nung bill ng Pangulo. Yun ang pwedeng kwestiyunin dahil sa tinagal tagal kong abogado, wala pa yata akong nabalitaan na pinadeklarang iligal at unconstitutional na committee report,” pahayag sini.
Antes kay Escudero, may tatlo ka mga senador nga nagpanginwala nga may blank items sa bicam report sa 2025 national budget. Apang ang presidential sister nga si Senator Imee Marcos nga kabahin sang bicam sa 2025 national budget nga absent man sa pagpirma sang report ang nag-insister nga may blangko gid man nga items rason nga wala na lang siya nagpirma.
Matandaan nga bangud sa alegasyon sang anomaliya kag iregularidad, gintawag ni former President Duterte nga imbalido ang GAA nga pirmado na ni President Ferdinand Marcos, Jr. Nagsabat naman si Marcos nga nagabinutig si Duterte. Nagpaguwa man sang statement ang Malacañang nga nagsiling nga “criminal” ang amo nga mga alegasyon.
