Indi magsuporta si United States President Joe Biden pananglitan gusto sang Israel nga atakehon ang nuclear program sang Iran.
Ini ang lakip lang sa mga gina-bati-bati nga posible kabahin sang pagtimalos nanday Israeli Prime Minister Benjamin Netanyahu matapos nagpaulan ang Iran sang ginabanta 200 ka missiles sa Israel sang nagligad nga gab-i nga ang iban nakalusot pa depensa sang amo nga Jewish state.
Ang pahayag ni Biden nga indi ini magsuporta sa pagtimalos sang Tel Aviv ang kasunod sang iya diskusyon sa iban nga lider sang Group of Seven ukon G7 nga amo ang Canada, France, Germany, Italy, Japan kag United Kingdom. Sa amo nga diskusyun na-istoryahan ang posible nga bag-o nga sanctions batok sa Iran.
Nahibaluan nga ang Estados Unidos kag ang mga kaalyado sini ang nagatulod sa Israel nga magpugong kag dapat gid nga balansehon sang maayo ang plano sini nga magtimalos batok sa Iran.
Ang pag-intra sang G7 ang sa tuyo man nga punggan ang paglapta pa gid sang gyera sa Middle East nga una natabo sa tunga sang Israel kag Hamas kag gin-intrahan sang iban pa gid nga militant groups nga amo ang Hezbollah kag mangin ang Houthis nga lunsay proxies sang Iran.
Kun tandugon sang Israel ang controversial nuclear program sang Tehran, amo ini ang makabig nga pinakadaku nga lihok nga maga-garit-garit gid sa amo nga pungsod kag magapaibwal pa sang gyera sa rehiyon sang Middle East.
