Ginabantayan subong sang bug-os nga Estados Unidos sang Amerika ang labing-una nga debate sa tunga nanday US President Joe Biden kag anay President Donald Trump bilang kabahin na sang ila rematch sa November 5, 2024 presidential elections.
Maragtason ini bangud ini ang labing-una nga debate sa tunga sang sitting president kag former president sang USA.
Naka-schedule nga mag-atubangay sa debate stage ang presumptive Democratic kag Republican party nominees takna 9:00 sa gab-i sa Atlanta, Georgia (9:00 sa aga oras diri sa Pilipinas subong nga Huwebes.)
Ini nga debate ang magalawig sang 90 minutos, may duha lamang ka commercial breaks, kag iga-mute ang ila nga mikropono magluwas lang kun ila na turno sa paghambal.
“While no props or pre-written notes will be allowed on the stage, candidates will be given a pen, a pad of paper and a bottle of water,” suno sa CNN network nga amo ang host.
Wala man sang audience sa sini nga debate agud nga masigurado nga ma-maximize sang mga kandidato ang ila nga tyempo para gid lamang sa sini nga aktibidad.
Lakip sa ginalauman nga mangin topiko sa debate amo ang ila economic platforms bangud ang ekonomiya sang Estados Unidos amo ang nagapanguna sa concern sang Americans; immigration, public safety kag reproductive rights; foreign policy nga ginalauman magalakip sang ila posisyon sa gyera sang Israel sa Gaza, padayon nga suporta sa Ukraine batok sa Russia, kag ang kumpetisyon sa China.
Mahimo man nga bukaron diri ni Biden ang mga kaso ni Trump ilabi na bangud sang nagligad lang nga bulan sang naghimo sang maragtas si Trump bilang labing-una nga US president nga na-convict sa kaso-kriminal bangud sa pag-falsify sang business documents sa New York hush-money case.
Sa pihak nga bahin, ang advisers kag mga kaalyado naman ni Trump ang nagatulod sa iya nga magtutok lang sa ekonomiya,
krimen kag inflation subong nga debate bangud sa poll numbers nga nagasaad nga may upper hand siya sa sini nga mga isyu.
Katapusan nga naka-debate sanday Trump kag Biden sang October 22, 2020a bilang kabahin man sang presidential race sang amo nga tuig. Pagkatapos subong nga adlaw, maga-atubangay sila liwat sa Sept. 10 sa ABC News.
