Padayon ang pagpangaluyag ni United States President Joe Biden sa Democrat donors kag nagpasalig man nga daugon sini ang presidential election sa Nobyembre apisar nga madamo ang nadismaya sa iya pigado nga performance sa una nga presidential debate batok kay anay Presidente kag subong presumptive Republican nominee Donald Trump.
Kasunod sang amo nga debate, sunod-sunod nga fundraising events ang gintambungan ni Biden dala ang promisa nga indi sini pag-ibandona ang iya kandidatura para nga magpabilin sa White House sa masunod nga apat ka tuig.
Sa New Jersey, ginsiling sang 81-anyos nga presidente nga indi nangin maayo ang debate night para sa iya apang mas magabato siya bangud ginpahayag sini nga isa ka “genuine threat” sa demokrasya kag ekonomiya si Trump.
Magluwas sa New Jersey, nag-diretso man si Biden kag asawa nga si Jill sa East Hampton sa New York para makakuha sang dugang nga pondo.
Base sa public records, ang amo nga event ang ginpatigayon sa balay ni Avram Glazer nga tag-iya sang Tampa Bay Buccaneers football team.
Sunod man nga ginkadtuan sang presidente ang balay sang isa ka investor nga si Barry Rosenstein sa East Hampton sa gihapon.
Suno sa Biden Campaign, nakatipon sila sang pondo nga masobra $27m ukon P1.58-billion sang Huwebes kag Byernes lakip na ang New York City fundraiser nga nakatutok sa LGBTQ community.
Nahibaluan nga nagataas ang pagduda kun epektibo pa ang reelection campaign ni Biden kasunod sang iya pigado nga debate performance rason nga may ginalantaw naman nga potential replacements.
Apisar wala pa sang pormal nga nagtulod nga manaog sa kampanya si Biden, may shortlist sang posible magabulos sa iya agud mangin kandidato sang Democrats nga nagalakip kanday Michigan Governor Gretchen Whitmer, California Governor Gavin Newsom, kag Vice President Kamala Harris.
