Nadakpan sang Presidential Anti Organized Crime Commission (PAOCC) kag Bureau of Immigration (BI) ang “big boss” sang Lucky South 99 nga isa ka Philippine Offshore Gaming Operator (POGO) hub nga naga-operate sa Porac, Pampanga.
Ini amo si Lyu Dong nga kilala man sa mga alias nga Boss Boga, Boss Apao, Boss Bahaw, “Hao Hao” kag “boss of the boss.”
Ini nga lalaki ang ginatudlo nga yara sa likod sang scam farms nga lapta-lapta sa Pilipinas lakip na sa duha ka kumpanya sa Ilocos Sur, Lucky South 99 kag Hongsheng/Zun Yuan sa Central Luzon, kag duha pa gid ka illegal POGO sa Calabarzon.
May impluwensya man ini sa iligal nga mga aktibidad sa Cebu kag Metro Manila.
Nadakpan siya kagab-i sa isa ka residential subdivision sa Laguna.
Suno kay PAOCC spokesman Dr. Winston Casio, subject si Lyu sang warrant of arrest kag mission order.
Ginakabig ini nga daku nga accomplishment sang Bureau of Immigration, Department of Justice, kag Inter-Agency Council Against Trafficking.
Suno kay Casio, bisan ano pa kadamo nga Chinese ang ila mapa-preso, indi gihapon ini bastante kun indi madakpan ang mga boss kaangay kay Lyu.
Ginbyahe man si Lyu padulong sa PAOCC Detention Facility sa Pasay City para sa inquest procedures.
Maga-file mismo sanday Casio sang kaso batok kay Lyu bangud gina-alegar nagbutang ini sang patong sa ulo ni Casio kag sa iban pa gid nga mga opisyal sang PAOCC nga nagbutang man sang ila kabuhi sa katalagman.
Ang mga kaupdanan ni Lyu ang pangayuan man sang dokumentasyon agud matumod sang Bureau of Immigration kun legal ang ila pagtinir sa Pilipinas.
