Indi lang segundo distrito ang nabuligan ni Former President Benigno Simeon “Noynoy” Aquino III kundi pati na ang syudad kag probinsya sang Iloilo paagi sa infrastructure projects nga gintukod sa iya nga termino.
Ini ang kabahin sang ginbalik-balikan ni Iloilo Second District Representative Mike Gorriceta kadungan sang pagtaliwan sang anay presidente subong nga adlaw, Hunyo 24.
Sa interview sang Bombo Radyo kay Gorriceta, iya ginpahayag nga mas malapit ang iya amay nga si Former 2nd District congressman kag Pavia mayor Arcadio H. Gorriceta sa pamilya Aquino.
“Kada mag-abot halin sa Manila [si Presidente Aquino] kaupod si anay Senate President Franklin Drilon, nagaupod ang akon nga amay kag ara man ako,” pahayag ni Gorriceta.
Diri suno kay Gorriceta kag nakit-an niya kun ano ka-ordinaryo nga tawo si Aquino bisan sa likod sang camera.
“Simple siya nga tawo kag kun maghulag siya, daw ordinaryo lang even sa likod sang camera kag sa behind-the-scenes. Nakita ko gid kun paano niya ginpakita ang pagpalangga ya sa syudad kag probinsya sang Iloilo sang term niya,” dugang ni Gorriceta.
Lakip sa ginmensyonar ni Gorriceta nga proyeko ni Aquino sa Iloilo amo ang dalan halin sa airport sa Cabatuan padulong sa Iloilo City. Ang Senator Benigno S. Aquino Jr. Avenue amo ang highway nga halin sa Iloilo Diversion Road padulong sa gate sang Iloilo International Airport.
Ini ang dalan nga nagatraverse sa banwa sang Pavia, Sta. Barbara, kag Cabatuan.Lakip man sa namensyonar amo ang P160 million project nga gin-initiate ni Congressman Gorriceta nga nagalakip sang ginsemento nga dalan kag construction sang taytay nga nagakonekta sang Bucari area tubtob sa “7 cities” sang Alimodian.
Ini ang nagapatuhoy sa seven remotest barangays sa Alimodian: Cabacanan Rizal, Lico, Umingan, Dao, Manasa, Cabacanan Proper, and Tabug.
“Daku gid ni nga bulig sa mga pumuluyo ta,” pahayag ni Gorriceta.
