Nagpaguwa na sang desisyon ang korte sa New York, USA kag napamatud-an nga wala ginkopya sang British musician nga si Ed Sheeran ang classic song nga “Let’s Get It On” ni Marvin Gaye!

Nalab-ot sang Manhattan jury ang unanimous verdict matapos ang halos tatlo ka oras nga deliberasyon.

Sa amo nga kaso sa copyright infringement, involved ang Grammy-winning song ni Sheeran nga “Thinking Out Loud” nga nangit hit umpisa sang 2014.

Antes sini nga desisyon, ginpakita sang 32-anyos English singer-songwriter nga pursigido siya nga madaog ang kaso paagi sa paggamit sang gitara kag pagkanta mismo sa sulod sang korte agud lamang mapamatud-an nga indi ini guilty sa pagkawat sa inubrahan ni Gaye.

Una naman sini nga ginpahayag nga pananglitan mag-desisyon ang korte nga guilty siya sa amo nga kaso, maga-untat na ini sa paghimo sang musika.