Nagpaguwa na sang desisyon ang Korte Suprema sang Estados Unidos sang Amerika, Hulyo 2, kun sa diin nakasaad nga may immunity si anay Presidente Donald Trump sa criminal prosecution para sa pila ka akto nga ginhimo sini sang siya pa ang presidente sang amo nga pungsod — bagay nga ginkabig sang Republican White House candidate nga “big win” samtang nagahilapit ang presidential elections.
Ang nag-anunsyo sang landmark ruling amo si Chief Justice John Roberts on behalf sang anum ka justice conservative majority sa korte.
6-3 ang nangin desisyon sang Supreme Court apang gin-athag nga apisar may immunity nga gina-enjoy ang former presidents sa ila ginhimo nga sulod sa ila constitutional authority, wala naman sang immunity sa mga aktwasyon nila sa ila private capacity.
“The President enjoys no immunity for his unofficial acts, and not everything the President does is official. The President is not above the law. But Congress may not criminalize the President’s conduct in carrying out the responsibilities of the Executive Branch under the Constitution,” kabahin sang ruling.
Ginpahangop man sa ruling nga wala lamang naga-apply kay Trump ang desisyon kundi sa tanan nga “occupants of the Oval Office, regardless of politics, policy, or party”.
Ini nga desisyon ang nagakahulugan nga gina-reject na sang Korte Suprema ang desisyon sang federal appeals court sang Pebrero kun sa diin ginsaad una nga wala sang immunity ang anay presidente sa gina-alegar mga krimen sini nga nahimo sang tion nga siya ang presidente lakip na ang iya tuyo nga pagbaliskad sang election results sang 2020 sang tion nga ginlutos siya sang Democrat nga si Joe Biden.
Sa desisyon man sang Supreme Court, nakasaad nga ang lower courts ang maga-desisyon kun ano nga mga akto sang former presidents ang makabig nga “official” kag indi official bangud sa “official acts” lamang may immunity ang mga presidente.
Ginkalipay naman ni Trump ini nga landmark decision kag gintawag pa nga daku nga kadalag-an sa constitution kag demokrasya sang Estados Unidos.
“BIG WIN FOR OUR CONSTITUTION AND DEMOCRACY. PROUD TO BE AN AMERICAN,” kabahin sang pahayag sini sa isa ka social media post.
Nahibaluan nga magluwas diri, isa sa ginabantayan subong sa Amerika amo ang sentence hearing kay Trump sa masunod nga semana matapos nga na-convict ini sang nagligad nga bulan sa hush money case. Siya ang labing-una nga presidente sa maragtas sang U.S. nga napamatbatan nga “guilty” sa kaso-kriminal.#
