Temporaryo lamang nga nahaw-asan ang mga motorista sa rollback sa presyo sang produktong-petrolyo subong nga semana bangud ginalantaw nga magasaka na naman ini epektibo sa Martes.
Base sa kalkulasyon sang oil companies, ginalantaw nga magasaka ang presyo sang gasolina sang P1.10 tubtub sa P1.50 per liter; ang presyo sang diesel naman ang ginalantaw man nga magtaas sang P1.00 tubtub sa P1.40 per liter; samtang ang presyo sang kerosene ang ginalantaw nga magsaka sang P1.05 tubtub sa P1.45 per liter.
Apang suno sa mga kumpaniya sang produktong petrolyo, pwede pa maglain ang final projection sa price hikes buwas, Agusto 16, bangud may duha pa ka adlaw nga nabilin para sa settlements subong nga semana.
Suno sa industry experts, ang liwat nga pagsaka sang presyo sa international market ang bangud man sa liwat nga pagsaka sang tension sa Middle East.
Ina bangud naka-high alert subong ang Israel sa posible balos sang Iran, amo man ang atake sang Hezbollah halin sa Lebanon kag Houthis nga naka-base sa Yemen.
Ginsaad man nga ang kinagamo sa Gaza ang labi man nga naglala ilabi na kasunod sang kamatayon sang masobra 100 ka sibilyan sa isa lamang ka atake kun sa diin ang Israeli Army ang ginatudlo nga may kahimuan.
Magluwas sa sini nga economic kag geopolitical factors, gina-monitor man sang market traders ang release sang bag-o nga supply-demand outlook sang Organization of the Petroleum Exporting Countries (OPEC) amo man ang International Energy Agency (IEA) nga naka-base sa Paris, France.
