ILOILO – Nagdugang sang masobra sa 10 ka mga biktima sang dengue sa probinsya sang Iloilo ang na rekord sang Hospital Management Office sa sulod lamang sang isa ka adlaw.
Sa interview sang Bombo Radyo kay Iloilo Governor Arthur Toto Defensor Jr., iya ginpahayag nga sang Hulyo 8, may yara sang kabug-osan nga 769 ka mga dengue patients ang yara sa mga ospital sa probinsya apang nagdugang ini sang Hulyo 9 nga may yara sang 788 ka mga dengue patients.
Suno kay Defensor, kinahanglan nga mangin hugot ang pagpangampanya batuk sa dengue sang mga alkalde sa tagsa ka mga kabanwahanan kaangay sang pagpangampanya sadto nga eleksyon.
Ang alkalde ang mangin pinuno sa kampanya agud nga manduan ang mga punong barangay nga magpatigayon sang pagpaninlo sa ila tagsa ka mga lugar indi lang kun Sabado nga adlaw apang nagakadapat nga himuon ini kada adlaw.
Dugang pa sang gobernador mas maayo kun bisitahon ang tagsa ka mga balay sang mga pumuluyo agud nga ma tsekyar ang lugar kun may yara sang mahimo nga istaran ang mga lamok.
