Ginpa-Bombo sang isa ka biktima nga ginkawatan sang motorsiklo sa Tagbak terminal ang CCTV footage sang pagpangawat sa iya motor nga onse na sini ka tuig nga service sa trabaho kag ginkwat ini sang tinalikdan nga Enero 31.
Separado man ini sa natabo sang nagligad nga motornapping malapit sa Land Transportation Office kun sa diin nakuha man ang motorsiklo nga ginapanag-iyahan ni ZJ Cenar sa Brgy. Quintin Salas, Jaro, Iloilo City
Sa interview sang Bombo Radyo kay Butch Marterior ang ginkawatan sang motorsiklo, iya ginpahayag nga nagpawashing lang ini sang iya motorsiklo kag ginpark lang sini anay sang makadali agud nga pahurawon ang ulan sadto nga adlaw.
Suno pa sa iya nga lima lamang ka metros sini ang iya kalayuon sa motorsiklo kag kun sa diin ini siya nahamtang, apang wala gid ini maglaom nga makawat ang iya motor nga suno pa sa iya nagsalig man ini kay may ara man sang iban pa nga upod nga motorsiklo ang iya motor.
Dugang pa sini nga mga 30 minutos ang iya ginhulat antes maghuraw ang ulan apang sang ginkadtuan na sini ang iya motorsiklo wala na sini ini makit-an kun sa diin sini ginbilin.
Nakasecure naman ini sang CCTV footage apang indi klaro bangud madulom ini.
Suno pa kay Marterior, tuman ka dako nga huol ang ginhalit sini sa iya bangud nga mabudlay para sa iya nga mag-commute pakadto sa iya trabaho.
Sa karon nagapangayo ini sang kooperasyon sa mga pumuluyo nga kun sin o man ang nakakita ukon sin o man ang ginbaligyaan sa iya nga kun pwede magkooperar sa mga kapulisan agud mabalik sa iya ang iya motor.
