ILOILO — Wala sang malain nga record ang biktima nga ginluthang-patay sa Barangay Mat-y, Miagao, Iloilo.
Ang biktima amo si Pio Javier, isa ka pharmacist, nagapanag-iya sang isa ka botika sa banwa kag bana sang isa ka doktor.
Samtang ang suspek naman amo si Renato Fredecilla, residente sang amo nga barangay kag ginapatihan nga nagasuprer sang nervous breakdown.
Sa interview sang Bombo Radyo kay Punong Barangay Elizabeth Lontok, iya ginpahayag nga mabuot nga sahi sang tawo si Javier kag nangin maayo nga amay sa iya duha ka mga anak nga lalaki.
Suno kay Lontok, ginakasubo nila ang pagtaliwan sang ila abyan ilabi na nga gulpiyada ang pagpatay sa iya kag wala man lang sang mga senyales nga mapatay ini.
Ginlaragway man sang opisyal nga ‘on time’ magbayad ang biktima sang ila business permit sa ginapanag-iyahan nga Negosyo, sa diin wala gid sang may isaway nga malain sa iya.
Nahibaluan nga subong kuntani nga adlaw, ginalauman nila ang partisipasyon ni Javier sa ila kahiwatan nga Flores de Mayo, apang, sa masubo nga kahimtangan, indi na ini makatambong bangud sa natabo nga pagpatay sa iya.
