ILOILO CITY – Naglab-ot sa 141 ang nabiktima sang palupok sa Western Visayas may kanagtanan sa pagsaulog sang bag-ong tuig.
Sa interview sang Bombo Radyo kay Dr. Mae Ann Sta. Lucia, Regional Coordinator for Injury and Violence Prevention Program sang Center for Health Development – Department of Health 6, iya ginpahayag nga mahimo pa nga madugangan ang lista sang mga biktima bangud nga tubtub pa sa Enero 5 ang monitoring.
Suno kay Sta. Lucia, 36 ka kaso sang firecracker incidents ang na record sa mga centenel site sa rehiyon nga ginalakipan sang Corazon Locsin Montelibano Memorial Regional Hospital sa Negros Occidental, Western Visayas Medical Center kag Iloilo Mission Hospital sa syudad sang Iloilo kag sa Western Visayas Sanitarium sa probinsya sang Iloilo.
Sa bahin naman sang non-centenel site suno kay Sta. Lucia, naglab-ot sa 105 ka kaso ang na record kag kun pahat-pahaton: 12 sa probinsya sang Aklan, 11 sa probinsya sang Antique, 17 sa probinsya sang Capiz, 4 sa probinsya sang Guimaras, 40 sa probinsya sang Iloilo, 12 sa syudad sang Iloilo, 34 sa Negros Occidental kag 11 sa Bacolod City.
Ginpahayag ni Sta. Lucia nga kalabanan sa mga biktima ang naka-angkon sang pilas sa kamot, mata kag iban pa nga bahin sang lawas tuga sang kwitis kag boga sa diin 97 sa mga biktima ang makabig nga active ukon sila gid mismo ang nagpangamot sa pagpalupok samtang 42 naman ang passive ukon naigo lamang.
