STA. BARBARA ILOILO– Nakilala na ang biktima sang summary execution nga nasapwan sa Brgy. Bitaog Taytay Sta. Barbara Iloilo.
Ang biktima amo si Colt Premarion 23 anyos, kasado kag residente sang Brgy. Pasig Lambunao Iloilo.
Ang biktima ang positibo nga ginkilala sang iya tiyo.
Sa panaysayon naman sang pakaisa ni Premarion, iya ginpahayag nga antes paman natabo ang insidente, nasumalang pa niya ang biktima apang wala man siya sang ideya sa kun ngaa nga ginpatay ini.
Indi naman niya mapat-od kun ano gid ang trabaho ni Premarion.
Ginkumpirma man niya nga ang motor nga nakit-an sa crime scene ang wala ginapanag-iyahan sang biktima kag ini ang na-carnap kag may yara sang blotter sa Sta. Barbara Municipal Police Station.
Ang amay ni Premarion ang isa ka anay police officer apang madugay na nga nag-resign sa serbisyo kag sa subong yara sa ospital bangud naaksidente sa motor.
Sa interview sang Bombo Radyo kay Police Chief Master Sergeant Jesus Wilson Saludares, deputy chief of Police sang Sta. Barbara Municipal Police Station, iya ginpahayag nga padayun pa ang ila ginahimo nga imbestigasyon sa kun ano ang motibo sang suspek sa brutal nga pagpatay sa biktima.
Ila naman paga-usisaon ang kuha sang close circuit television (CCTV) footage sa balay sang tag-iya sang motor agud mahibaluan kun sin-o ang responsable sa pagkuha sini.
Suno pa kay Saludares, nagpakig-angot naman sila sa Lambunao Municipal Police Station kag ginpakita ang picture rason nga natigayun nga na-identify sang tiyo ang biktima.
