Gin-depensahan nanday anay United States Presidents Barack Obama kag Bill Clinton si current President Joe Biden kasunod sang pigado sini nga performance sa una nga presidential debate batok sa Republican nga si anay President Donald Trump.
Suno kay Obama, nagakatabo gid man ang “bad debate nights” apang ang eleksyon suno sa iya ang choice man gihapon sa tunga sang persona nga nagpakigbato para sa Americans kag persona nga kaugalingon lang niya ang iya ginapanumdom.
“Bad debate nights happen. Trust me, I know. But this election is still a choice between someone who has fought for ordinary folks his entire life and someone who only cares about himself,” suno sa post ni Obama sa X. “Last night didn’t change that, and it’s why so much is at stake in November.”
Sunod man nga nagpaguwa si Clinton sang iya post kag nagsiling nga ang importante amo ang facts kag history kasunod pa sang iya ginpaguwa nga lista sang “solid accomplishments” sa idalom sang termino ni Biden.
“I’ll leave the debate rating to the pundits, but here’s what I know: facts and history matter,” pahayag naman ni Clinton sa amo man nga social media platform.
Sa presidential debate sang nagligad nga Byernes sang aga (oras sa Pilipinas), matandaan nga indi na mahangpan ang ginpanghambal sang 81-anyos nga presidente kag pila ka beses man nga wala sang isugpon — bagay nga ginkadlawan sang Republicans kag ginakabalak-an naman sang Democrats.
Gina-interpret sang iban ang komento nanday Obama kag Clinton nga gina-ako nila ang “debate disaster” nga natabo apang gina-engganyo man ang publiko nga indi ini pagtutukan.
Una naman nga nagkumpirma ang Biden campaign nga indi mag-atras sa rematch si Biden kag magatambong gihapon ini sa ikaduha nga presidential debate sa Septyembre.
Sa rally naman sa Virginia, wala na sang gin-usik nga tiyempo si Trump kag nag-deklarar sang daku nga kadalag-an batok kay Biden kasunod sang natabo nga presidential debate. Suno sa 78-anyos nga Republican presumptive nominee, todo gid ang tuon ni Biden tubtub nga wala na ini nakahibalo sang iya ginahimo.
“He studied so hard that he didn’t know what the hell he was doing,” pahayag sini sa atubang sang iya supporters. “No amount of rest or rigging could help him defend his atrocious record.”#
